زووم 

زووم

قالوا لي أن السيد محمد الكرتيلي قال في برنامج مستودع بالرياضة·· أن رؤساء الفرق المغربية الكروية ماشي البرلمانية لا يحترمهم أحد·· وقال كذلك بأنهم هم الذين يحكمون ويروجون 36 مليار ديال السنتيمات·· أكثر من صوصيال الفوسفاط··

السيد محمد الكرتيلي الذي أؤكد أنه لا يرغب في كرسي أوزال·· لأن مظلة هذا الأخير بحالها بحال "لامبر سولير"·· ما قد هو على حريق الشمس·· وهمه الآن هو أن يظل >مضرك< وراء الرئيس الجديد لنادي الرؤساء·· لأن طموحه هو الكتابة العامة للجامعة·· وقبل أن يصل وهو في الطريق أسأله >هل هو سيحترم ذاك الرئيس الذي كان قدره هو الإستغناء عنه من مؤسستين عموميتين؟ وذلك الرئيس الآخر الذي وعد بمواجهة القراء من عشاق فريقه وحرمهم من كرم رؤيته·· أو غيرهم من الرؤساء الجبايهية·· والله يهدي السيد محمد الكرتيلي لأنه كيكب الماء في الرملة··

وأترككم مع إحدى حلقات "بروح رياضية" التي قدمت بـ "الرياضية" خلال الموسم الماضي·· وما جاء فيها حول إحترام رؤساءنا المحصنين بالسبوعة··

 قومو·· وقفو·· وكلموهم···

أدعو قرائنا الأعزاء أن يقفوا وقفة احترام وتقدير لرؤساء  "الفراقي" المغربية اللي شاربين المر والحدج معنا·· كيعيشو سوايع كحلة مع كل خسران··  وكل طيحة·· ورغم ذلك كيبقاو جالسين فبلايصهم·· لأنهم كيموتوا على الكرسي·· وما قدرينش يخليو الفريقة يضربها الخلا·· الرئيس المغربي من صفاتو الإخلاص للمايو والوقوف بجانب اللعابة في السراء  والضراء·· في البرد والشتا·· وكيسمع روائع السب والشتم·· وجميع أنواع التمرميد والتسخسيخ·· وكيبقى صامد·· كيتفرج في العجاجة اللي كطير الأخضر واليابس··  وماكيديهاش فيها·· وما كيهمو لا تهراس ولا  تدكاك·· اللي كيهمو هو ما يخليش كرسي الرئاسة خاوي لواحد آخر·· يستغل مجهودو وعرقو وياكل ليه غلتو·· الرؤساء ديال الفراقي ديالنا طيلة المدة الرئاسية ديالهم كينهجو

سياسة غريبة·· كيبرحو في الربح·· ويصقلو فالخسران·· ملي كتربح الفريقة كتلقاهم كيتسابقو على بوقات الإذاعة وكاميرات التلفزيون·· لأن هذا الرؤسا مللي كيربحو كيفضلو هما اللي يبلغو النتيجة لعائلات اللعابة والمحبي··  وهما عارفين أن الإذاعة والتلفزيون كيسبقو الكريوو والكاغيط·· وملي كيخسرو  راهم دايرين الرابلسونات اللي كيكريو حناكهم باش ينوبو عليهم في

التفسير والكوفِرتير، وكيلصقو الخسران لهادك اللي ماسقاش الكازون الصفر والبلاستيك..وقسوحية راس المدرب اللي ما سمعش الكلام·· ومول جبان كولوبان اللي كيغوت في التيران··

رؤساء الفراقي عندنا··  فالربح كيوليو هما أصحاب الخطة والخبطة..وكتولي السياسة ديالهم ايجابية..  وبأن الفريقة بخير وعلى خير..  وهما وحدهم اللي خدامين·· والاخرين  كيطبقو تعليماتهم·· كيعطيو أوامرهم للشيفورات مللي تربح الفريقة..يوقفو قدام

باب المنصة·· ومللي تخسر يبقاو بعاد..كيخرجو سالتين ومضركين في كبوط كولمبو والراس مغطي··  والله يكون في عون هاذوك الشيفورات اللي كيبقاو ودنيهم لاصقة على الراديو·· كيفرحو مللي فريقة رئيسهم كتماركي·· وكيتقلقو مللي كيتماركا عليها·· والله يكون فعوانهم··

ملي كيسالي الماتش الرؤسا يلا ربحو .. كيتنفخو..  ويمشيو ويجيو.. وينثروا في  سيكارهم باش يبان دخانهم.. وكيتلقاو التهاني من الحياحة الرسميين اللي هما

المنخرطين المشريين·· ملي كتوقع الفاس فالراس·· وقبل لا يصفر لاربيط..كيديرو طاكية الإخفاء باش ميبانوش.. وكيسلتو من كولوار مظلم·· خايفين من الغضب الآتي مع صفارة التسعين .. ويغبرو السيمانة كلها··

الرؤسا عندنا ماقدروش عولَمَا النفس يفسرو حبهم الصوفي لكرسي الرئاسة·· شحال من واحد كيگول أنا ماباغيش وباغي نمشي بحالي..وغادي نزيد غير هاذ العام·· كيسالي العام·· وكيدير بت نبت·· وشحال منهم عندنا··

الرؤسا عندنا عارفين بأن كلشي عايق بهم ومدايرين ودن كيال ..كلشي كيعرف بأنهم ماكيجيوش لله في سبيل الله للرئاسة·· منهم اللي ولا سبايبي·· واللي ولا بزناس كيصرف اللعابة بالأورو·· و اللي ولا مراقب في

البيبان واللي كيتسنا وجيبتو·· وبعض الرؤسا خاصنا نحنطوهم بحال الفراعنة·· في المدن  تبدلو الولاة والعمال·· والمدربين واللاعبين وحتى الدقايقية المخلصين للشيشة .. وهما باقيين لاصقين  فبلايصهم·· بحال يلا هاد البلاد عاكرة··

نديرو خاطر زعيمهم اللي قال لينا حاقرينهم واخا هما اللي كيحكمو·· نوقفو ليهم مللي نبغيو نكلمهم·· ونشيطو ليهم فالصواب·· لأن سيادتهم خاسرين وقتهم ورزقهم·· أكثر من صوصيال الفوسفاط··

مصطفى بدري
m.badri@almountakhab.com